А отъ начала царства Костантинова до прьваго сьбора Никиискаго лѣть 12. При семъ же велицѣмъ цари Костантинѣ бысть прьвыи сьборъ въ градѣ Никеистѣмъ, святыхъ отецъ 318, а патриархь былъ Александрь Царяграда, на Ариа злочестиваго, създание и тварь Сына Божиа глаголюще, мѣсяца мая въ 22. Умре же великии царъ Костантинь 65 лѣть. Се же о немъ явимъ въкратцѣ, кто бѣ съи Костантинъ. Бѣаху владѣюще западною страною, рекше Римскою, трие мужи, и аще которыи умретъ, и они иного поставятъ въ того мѣсто, и того владѣли 460 и 18 лѣтъ. Бѣаше же у единого отъ тѣхъ трии мужии и жена непраздна, и въ немощь въпаде въ смертную; жена же умре, а младенецъ трепетааше въ утробѣ еа. Боляре же, вземше ножъ, пропороша чрево еа, и выняша младенца жива и нарекоша имя ему Иулии Кесарь; и тои Иулии Кесарь възрасть, да своихъ двою товарыщевъ убиль; бѣ бо нравомъ гнѣвливь, ростомъ малъ и чернь, очи велицѣ. Бѣ у него воевода именемъ Антонии, и обручи за него сестру свою Октавию, и посла его на Птоломеа, Египетскаго царя, и на его дщерь Клеопатру мудрую. Онь же шедъ и въмѣсто брани смирение възлюби; посла бо ко нему Клеопатра, глаголющи: «како хощеши, съ кровию ли или безъ крове, градъ приати?» Онъ же рече: «безъ крове;» и посагну за него Клеопатра мудраа, дщи Птоломѣа Прокаженаго. И то увѣда Августь, разгнѣвася на Антониа и на Клеопатру, и не точию за оступление, но и за обругание сестры своеа Октавѣи, и вдасть Октавѣю за Антипатра Иродовича, избивъшаго младенца. Поиде Августъ съ зятемъ Антипатромъ воевати въсточныа страны, и то слышавъ Антонии събра воа многы, Персы, и Миды и Ливию, и бысть имъ бои на мори, и отъ множества крове не бѣ знати воды, и тако убиень бысть Антонии, Клеопатру же яша живу. Въсхотѣ же Августъ привести еа живу въ Римъ на показание сестри своеи Октавѣе, и повелѣ твердо стрещи еа; она же видѣвши себе плѣнену, и усмотривши, яко нѣсть ничто же славы честнѣиши, изволи таиную смерть сътворити себѣ, нежели плѣнницею зватися, и припусти къ собѣ двѣ скорпии, ихъ же ношаше въ сосудѣ въ пазусѣ своеи, и утрави себе ими, и уядена бысть, и тако съмерть приа. Августъ же много истомление дасть воиномъ, стрегущимъ ю, о несъхранении еа; повелѣ же тѣло еа помазати змирною, дабы могль цѣло показати въ Римѣ тѣло еа. А и оттолѣ нача Иулии воевати въсточныя страны, Антиохию Великую, и Селевкию и Иерусалимъ, да поима грады многы и покори подъ свою власть. И родися у него сынь Августъ кесарь, и царствовалъ 52 лѣта; при томъ Августѣ бысть рождество Христово. Потомъ Тиверии же царствова въ Римѣ кесарь; при томъ распятся Господь нашъ Исусъ Христосъ. По Тиверии же царствова въ Римѣ Неронь царь. По Неронѣ царствова Еυспасиань, сынь его. По Испасианѣ царствова сынь его Титъ; тои Титъ взялъ градъ Иерусалимъ, три стѣни разбиль и Жидовь расточиль по многымъ градомъ; оттолѣ нѣтъ у Жидовъ никакова града своего. Потомъже, по многыхъ лѣтѣхъ, царствова въ Римѣ злочестивии Диоклитиань и зять его Максимиань; и тѣ мучители мучиша многыхь святыхь мученикь: Диоклитиань святаго Георгиа, а Максимиань святаго Димитриа въ Солуни, въ лѣто 6802; и во Никомидию пришедъ, двѣ тмѣ мученикъ огнемъ съжели. И въ Севастии 40 мученнкь при ихъ же власти мучены, и иныхъ многыхъ мученикь мучили. А Максимиану царю была сестра Феодора за Костею за Зеленымъ, за отцемъ Костантина царя благочестиваго; да Костантинь царь великии родися у Консты не отъ тое Феодоры, но отъ Елены благочестивыя. Прилучися дѣло таково: царь Диоклитиань и Максимиань послали того Консту Зеленого на Пръсидскую землю мирь взяти съ Пръсидскимъ царемъ; и прилучися ему, идучи, ночевати въ градѣ Серпии, у гостинника у Феодора именемъ, и захотѣлося ему плотскаго смѣшения. Гостинникъ же дасть ему на ночь дщерь свою Елену, красну сущу, и тое нощи зачался у неа младенецъ. Констя же превысокии, поидя отъ гостинника, и оставилъ Еленѣ ризу царскую и пръстень златъ, да пошелъ на восточную страну, рекше на Персидскую, и тамо пришедъ посолство исправилъ и миръ вѣчныи взялъ, и възвратися въ Римъ инымъ путемь, и бысть отъ цареи въ чти велицѣи. А у Елены доиде время, и родися у неа сынъ, и нарекоша имя ему Костантинь, и живяше съ материю; гостинникъ же Елены не далъ замужъ, но кормяше ю съ младенцемъ. Потомъ же царь Диоклитиань и Максимиань поидоста царствовати въ Никомидию, а Римъ поручили Констѣ Зеленому; и потомъ посла Конста пословъ своихъ на Пръсидскую землю, и прилучися имъ ночевати у того же гостинника. Дѣтескъ же Костантинъ, играа, въсѣде на пословь конь; они же, видѣвше его тако дръзновенна, досадиша ему; онъ же, росплакався, пожаловася матери своеи Еленѣ; она же, пославши къ посломъ ризу царскую и пръстень златъ, рече: «егоже есть риза и прьстень, то того есть сынь съи.» Они же, видѣвши ризу и пръстень, убояшася зѣло и едва укротиша младенца; и шедше на Пръсидскую землю и възяша миръ, и приидоша въ Римъ, и сказаша Констѣ цару про Елену и про сына еа. Конста же посла по Елену и по сына еа, и приведе ю въ Римъ съ великою честию, и дасть еи полату особную, и любяше ю паче царици Феодоры. И потомъ умираа остави царство Римское Константину сыну своему. И царствова великии царъ Константинъ въ Римѣ, и нача искати благочестиа, и приведе заточеныя христианы отъ темницъ, иже заточили злочестивие царие Диоклитиань и Максимиань, и нача искати православныя христианскиа вѣры; и въ то время бысть ему болѣзнь люта, яко не мощи врачемъ исцѣлити еа; и съвѣщаша цару врачеве, да вся пръвородныя младенца повелить заклати и кровь ихъ точити во едину лохань, и тою кровию измытися ему и отъ недуга премѣнитеся; онъ же повелѣ тому быти. И въсхапився отъ ложа и видѣ полкь жень стоящъ великъ зѣло, плачущь велми, и въпроси: «что суть си?» Они же сказаша ему, яко матери суть принесше своа младенца, иже хотятъ порѣзани быти твоего ради здравиа. Онъ же рече: «хощу да сиа живи будутъ;» и о ту нощь явистася ему Христова апостола Петрь и Павелъ, рекоста: «Господь посла насъ исцѣление тебѣ съвѣтомъ дати сицевымъ: понеже не пролиа кровь невинную, и сего ради Господь помилова тя, якоже и ты толико матереи помилова и съ чады, и не послушалъ еси злыхъ врачевъ твоихъ, хотѣвшихъ погубити душу твою въ рвѣ погыбели, и нынѣ да призовеши епископа Римскаго Селивестра именемъ, крыющагося страха ради мучителии, и речеть ти слово истинны, и породить тя водою и духомъ банею паки бытиа, и дасть ти печать въсыновлениа Божиа, и отъ недуга твоего премѣнишися;» и сиа рекши невидима быста отъ него. Въ утрѣи же Костантинь, призвавь Селивестра папу Римскаго, и сказа ему явление. Селивестръ сказа ему все по ряду православную вѣру христиаискую, и огласивъ его, и крести въ имя Отца и Сына и Святаго Духа. Царъ же крестився, и оттолѣ болѣ начатъ искати православиа. И потомъ поиде въ Греческую землю ко граду Византии, и взятъ его, и създа въ Византия мѣсто градъ въ имя свое, и нарече его Костантинградъ, и нача царствовати въ немъ и утвержати вѣру христианскую.